Bima

 Aing hayang ngancik na hate jalma-jalma jujur

nu wani kawas aing ngageuing Yudistira najan ka raja

nu ngahoak ka Arjuna mun geus mepehek awewe

nu mapatahan kajujuran kaasih ka Nakula-Sadewa

2011.

Sajak  Ena Rs.

Layung

layung sore euntreup

na mumunggang pasir nu mimiti samar

lamunan tibelat ku hibarna

: sono ka anjeun

mapag sareupna ku hariring

tembang melang nu paanggang

2011.

Mapag Umur Opat Puluh

tanggal-tanggal ngolembar tina kalender

jiga dangdaunan  maluguran

nu kaliwat nu kungsi kaiwat  na ingetan, patulayah

sapanjang panineungan saliwat-saliwat

taun demi taun surup unggal tungtung desember

mapag januari bagea panon poe anyar

nu bakal kasorang ngalangkang

datang dina rewuan tanya kahariwang

horeng hirup taya nu pasti

ukur dicipta-cipta rea  teuing patamorgana

diudag saparat waktu saparatna cakrawala

taya nu karaeh ukur lungse milang hanca-hanca kosong

tanggal-tanggal ngolembar, taun-taun surup

desember januari desember januari ngajejel na memori

hiji mangsa sadar horeng geus panjang lalampahan

anjog na mumunggang umur

najan teu pati wani:  wilujeng sumping umur opat puluh.

2011.

Isuk-isuk

sacangkir kopi pangbagea ti pun istri

diuyup saregot-saregot haneutna parat kana ati

sumanget lugay getih lancar otak mencar

singkil mapag panon poe anyar

neruskeun hanca nu can kabayar.

2011.

Dua Rebu Sapuluh

taun pinuh ku hujan

pinuh berkah, manawi?

ki patani teu reureuh metakeun pacul

melak binih di sawah jeung di huma

harepan nyengsreng dina dada

taun pinuh ku hujan

kutan,  seueur musibah?

banjir di hilir longsor di gunung

nalangsa leeh dina cimata

tawakal ngamuara jeroeun kalbu.

2010.

Mun Anjeun Nanya Kuring Rek Nanya

mun anjeun nanya: kunaon kuring milih nyingkur

nyisi tina nyemprungna jaman?

sabab simpe! nya, simpe nu ngalantarankeun kuring

tetep boga hate. nya, simpe nu nu ngalantarankeun kuring

bebas digawe. lain jalma nu padet jadwal diatur waktu

ngitung untung rugi diudag deretan angka-angka, target,

deadline jeung stres minuhan otak saperti anjeun  

najan kuring bobolokot leutak moal ngarasa eleh ketak

najan anjeun luis di jero kantor moal rek ngarasa eleh pamor

kuring rek malik nanya: neangan naon peuting-peuting anjeun

nyasab ka kafe-kafe, club malem jeung karoke?

halahab kalbu moal reureuh ku botolan alkohol

marudah hate cadu rehe ku geulisna pirang-pirang awewe

mustahil  nyalse ku musik nu cenah ngabebaskeun ekspresi

anjeun bakal terus kekeleyengan

 neangan di mana nyumputna tingtrim.

di sisi jaman,  ki dulur,  tingtrim bumetah.

2011.

Purnama Baheula jeung Ayeuna

baheula, mun purnama buruan rame ku budak

arulin ucing-ucingan tingcerewet nyieuhkeun simpe

: aranteng diasuh bulan

ayeuna, mun purnama buruan teu weleh simpe

bulan ngangkleung sorangan

budak anteng diasuh tivi.

2011.